-Ҳизби наҳзати исломии Тоҷикистон ба қароре омадааст, ки 8 марти соли равон, ҷаласаи Раёсати олии ҳизбро ҷиҳати баррасии вазъи кунунии мамлакат даъват кунад. Ин тасмим замоне гирифта шуд, ки нашрияи "Полярная звезда" (www.zvezda.ru) мақолаеро таҳти унвони "Тоҷикистон дар пешорӯи инқилоб" интишор дод. Мақолаи мазкур аз ҷаласаи ба истилоҳ "пӯшидаи" ҳукуматӣ бо роҳбарони сохторҳои қудратӣ таҳти роҳбарии Президенти Тоҷикистон нақл мекунад, ки дастуроти махфие дар мавриди фишорҳо болои аҳзоби сиёсӣ ва бахусус ҲНИТ, аъзо ва роҳбарони он, ширкати мардум дар гирдиҳамоиҳои соли 1992, таъқиби фаъолон ва ғайра мавриди баррасӣ қарор гирифтааст. zvezda.ru мегӯяд ин ҳама дар протоколи расмӣ, вале сирии ҳукуматӣ дарҷ шудаанд, ки нусхае аз он ба дасти  идораи он афтодааст. Муаллифи мақола менависад, ки ин ҳама кор ба хотири он аст, ки ҳукумат бо дастури Вашингтон аз нерӯҳои  русгаро ва эронгаро ҷомеаро пок созад ва роҳҳоро барои рӯ ба Ғарб ва бахусус, ИМА овардан ҳамвор созад. 

Баъди нашри мақолаи мазкур дастрасӣ ба торнигори zvezda.ru ва шабакаи иҷтимоии Facebook дар Тоҷикистон маҳдуд шуд. 

Аммо ахиран Сергей Строкин, шореҳи нашрияи "Коммерсант" муаллифи мақолаи чопшуда дар "Полярная звезда" будани худро такзиб кард. Вай гуфт ба ин мақола ҳеҷ иртиботе надорад, онро таҳрир накардааст ва аслан намедонад чаро он аз номи ӯ интишор ёфтааст. 

Мақомоти давлатии Тоҷикистон баргузории ин гуна ҷаласаҳои махфиро такзиб кардаанд ва интишори ба ин монанд мақолаҳоро тафриқаандозӣ миёни мардум унвон кардаанд. Аммо коршиносони масоили амниятӣ, маҳдуд шудани  баъзе сомонаҳо ва шабакаҳои иҷтимоиро аксуаламали ҳукумат ба ин мақола меноманд.

Фирӯзи МУҲАММАД

"TojNews"