Мавлон Мухторов,
муовини раиси Кумитаи дини назди ҳукумати Тоҷикистон гуфт, ки аризаи
шикоятӣ ба унвони додгоҳ рӯзи 27-уми март фиристода шудааст. Ин манбаъ
афзуд, ки сарнавишти масҷиди мазкур баъди муҳокимаи додгоҳӣ рӯшан хоҳад
шуд ва додгоҳ муайян хоҳад кард, ки он дар чӣ мақом:- масҷиди панҷвақта
ва ё ҷомеъ фаъолият хоҳад кард ва ё умуман минбаъд баргузории намоз дар
он ҷоиз ҳаст ё хайр.
Дар авохири соли гузашта Кумитаи дини Тоҷикистон баргузории намози
ҷумъа дар масҷиди "Муҳаммадия"-ро барои се моҳ манъ карда буд. Мақомот
гуфта буданд, ки танҳо дар сурати рафъи камбудиҳо, барои фаъолияти ин
масҷид иҷозат дода мешавад.
Дар ин миён Маҷлиси вакилони халқи ноҳияи Ваҳдат бо қабули як
муроҷиатнома ба ҳукумати Тоҷикистон гуфта буд, ба эҳёи намози ҷумъа дар
масҷиди "Муҳаммадия" зарурате боқӣ намондааст. Аъзои ин маҷлис гуфтаанд,
дар ин ноҳия чанд масҷиди дигари ҷомеъ фаъол шудааст ва намозгузорон
метавонанд дар он масоҷид ба ибодат машғул шаванд.
Ва аммо Ҳоҷӣ Акбар Тӯраҷонзода, роҳбари ҳайати муассисони «Муҳаммадия»
гуфт дар ҳоли ҳозир аз шикояти Кумитаи дин ба додгоҳи ноҳияи Ваҳдат
огоҳӣ надорад.
ozodi
