Роҳиб Ҷонсон чандин бор аст, ки даст ба сӯзонидани китоби муқаддаси аҳли Ислом мезанад. Соли гузашта ин амали худро ба муносибати солгарди инфиҷорҳо дар шаҳри Ню-Йорк анҷом дода буд. Мақомот ӯро барои ин амал 300 доллар ҷарима карданд, вале на барои қуръонсӯзӣ, балки барои риоя накардани қоидаҳои зиддисӯхтор.  

Додгоҳи Амрико қуръонсӯзии роҳибро ҳақ эълон кард. Охири соли 2011 узви додгоҳии олии ин кишвар Стивен Брейер изҳор дошт, ки амали Ҷонс муғойир ба қонунҳои ИМА набуд, зеро он озодии амал ва баёнро нақз намекард. 

Соли гузашта ҷавобан ба амали роҳиби муртади амрикоӣ дар шаҳри Мазори Шарифи Афғонистон шахсони ношинос ба намояндагии дафтари СММ ҳамла бурданд ва 12 нафарро ба ҳалокат расонданд, ки 7 тани онҳо шаҳрвандони хориҷӣ буданд. Он замон Ҷонс дар матбуот эълон кард, ки аз он чӣ дар Афғонистон рӯй дод мутаассиф аст, вале бори ҳеҷ гуноҳеро ба гардан намегирад. Ҳамон сол вай ҳатто хабар дод, ки барои курсии раёсати ҷумҳурӣ дар интихоботи Амрико талош хоҳад кард, вале номзадии худро нагузошт. 

Тавҳин ба муқаддасоти аҳли Ислом дар ҷомеаи имрӯзаи Амрико, як амали маъмулист ва хориҷ аз ҷазо мондани омилони ин гуна тавҳинҳову таҳқирҳо, сокинони ситезаҷӯро далертар мекунад.Чанде пеш сару садоҳое дар Афғонистон баланд шуда буданд, ки сарбозон дар пойгоҳи низомии Багром нусхаи дигари мусҳафи шарифро оташ задаанд. Ҳарчанд ин амал боиси вокунишҳои шадид шуда буд, вале то ҳол муайян нест, ки оё мақомот гунаҳгорони онро ба ҷазо кашиданд ё на.