- Ҳукуматдорони ноҳияи Данғара як масҷид дар ин қаламравро ба сехи дӯзандагӣ табдил додаанд. REGNUM истинодан ба мақомоти ин ноҳия навиштааст, ки "хоҳиши сокинони деҳаи Корезро дар мавриди ба сехи дӯзандагӣ табдил додани яке аз масҷидҳои ин деҳа қонеъ сохтаанд".

Манбаъ гуфтааст, ки ин масҷид аслан бекор буд ва мардум рағбати чандоне ба намозгузорӣ дар он надоштанд. Зеро аксаран адои намоз дар масҷиди дигар, ки дуртар аз он воқеъ аст, авлотар медонанд. Илова бар ин асноди он низ ҷавобгӯ ба талаботи давр набудааст ва он дар қитъаи замине сохта шудааст, ки ҳукумат расман иҷозат надодааст. 

Амалкарди роҳбарони ноҳияи Данғара ёди ҳар хонандаи калонсоли ин хабарро ба солҳои пеш, даврони Иттиҳоди Шӯравӣ мебарад, ки бо "талаби сершумори меҳнаткашон" масҷидҳо ба анборҳову мағозаҳо табдил дода мешуданд. Баъди шурӯъи ошкорбаёнии замони Горбачёв, аз ҳар сӯ сару садое хеста буд ва дидем, ки на яку на ду, балки садҳо масҷиди анборшуда дубора бо кӯмаки ҳамон меҳнаткашон обод ва ба намозгоҳ табдил дода шуд. Имрӯз аз иқдомоти исломситезии баъзе доираҳо акнун ҷуръати он ҳам пайдо шудааст, ки масоҷидро на танҳо дар бар банданд, балки ба муассисаи дигар табдил диҳанд.

Ин ҳам боз дар ҳолест, ки тибқи иттилои раиси вилоят Ғайбулло Афзалов. дар қаламрави Хатлон, 70 масҷид ба чойхонаву дигар муассисаҳои маданӣ табдил дода шудаАнд. Вай ҳатто гуфта буд, ки ҳоло дар ин вилоят, 270 ҷои ҷамъиятӣ, ки дар он бидуни иҷоза намоз гузошта мешуд, баста шудааст.