Абдуҷалол Ализода, ректори Донишкадаи исломии Тоҷикистон ба номи Имоми Аъзам Абӯҳанифа (рҳ), дар нишасти матбуотӣ гуфт: «Имсол барои муассисаи таълимии мо соли таърихӣ ва хотирмон мебошад. Бо пешниҳоди Президенти кишвар Эмомалӣ Раҳмон донишкада номи пешвои мазҳабамонро гирифт. Воқеан, ин иқдом басо рамзӣ ва бамаврид буд, зеро фаъолияти муассисаи таълимӣ дар доираи мактаби фиқҳии Имоми Аъзам сурат мегирад».
Вобаста ба Соли бузургдошт ва ҷашни 1310-солагии Имоми Аъзам (рҳ) донишкада 12 китобро ба табъ расонд. Устодону донишҷӯён аз ибтидои соли ҷорӣ дар доираи нақшаи ҷашнӣ дар телевизиону радио, маҷаллаву рӯзномаҳо ва идораву муассисаҳои кишвар бо гузоришу маърӯзаҳо баромад карданд.
Ректор ҳамчунин гуфт, ки бо пешниҳод ва дастгирии Президенти мамлакат нахустозмуни ҷумҳуриявии «Ҳифз ва қироати Қуръони Карим» баргузор гардид, ки дар он 130 довталаб иштирок намуд. Озмун шаффоф гузашт. Ғолиби он дар озмуни байналмилалии ҳифз ва қироати Қуръони Карим, ки дар шаҳри Москва баргузор шуд, миёни намояндагони 26 мамлакати дунё пирӯзӣ ба даст овард.
Донишкада чанде пеш нахустшумораи маҷаллаи «Маърифати исломӣ»-ро бо забонҳои тоҷикиву арабӣ ва хатҳои кирилию арабӣ аз чоп баровард.

Абдулқодири РАҲИМ